Совет за здравство на ЛДП: Да се престане со партиската поделба на раководните функции во јавните здравствени установи

Министерот за здравство Фатмир Меџити да даде образложение засновано на факти и докази односно да ги презентира злоупотребите утврдени од надзорот со цел јавноста да е информирана зошто го разреши  директорот на Универзитетската клиника за кардиохирургија проф. д-р Сашко Јовев, еминентно стручно лице во медицината, под чие водство за првпат во државата се започна со кардиохируршка интервенција на пресадување на срце, реагираат од Советот за здравство на Либерално-демократската партија.

Како што посочуваат од Советот на ЛДП, одлука за разрешување може да се донесе, но истата треба да биде поткрепена со сериозни аргументи за злоупотреба на службената положба и овластување, бидејќи изјавите со паушални обвинувања кон раководните лица на јавните здравствени установи не придонесуваат за надминување на состојбите во здравството.

– Воедно повикуваме да се престане со партиската поделба на раководните функции во јавните здравствени установи и да се овозможи овие позиции да бидат достапни за сите оние кои се истакнуваат со стручност, компетентност и моралност во извршувањето на одговорната улога на прв човек во јавна здравствена установа, додаваат од Советот.