Зајкова: Се надевам дека ќе станеме општество во кое конечно ќе надвладее правдата

Новата година е пред нас, нови 365 предизвици, посакувам пред се здравје, среќа и благосостојба на сите, вели потпретседателката на Либерално демократската партија, Моника Зајкова.

-Исто така се надевам и очекувам дека во Новата година, сите политички субјекти ќе се одважат и конечно ќе се изгласа Предлог- законот на ЛДП и ЛиДеМ за субвенциониран студентски оброк, мерка која ќе им овозможи на студентите да ги користат истите бенефити како нивните врсници од европските земји, дополнув таа.

Зајкова се надева дека Македонија чекор по чекор ќе стане прогресивно и отворено општество во кое легализацијата на канабисот и правата на ЛГБТ заедницата повеќе нема да бидат табу тема и ќе се развие свеста дека секој има право на сопствен избор и на она што го прави среќен.

– Се надевам дека ќе станеме општество со нулта дискриминација заснована на сексуална ориентација и родов идентитет. Општество каде секој ќе добива еднаков третман односно во кое посилниот ќе биде еднаков со послабиот.

Општество во кое конечно ќе надвладее правдата. Каде законите ќе важат еднакво за сите, вели Зајкова.
Според Зајкова она што е заеднички интерес и желба е и Македонија, конечно да биде една изборна единица, каде правото на глас на секој ќе биде соодветно претставено и вреднувано.